Müəllim Olmaq İstəyənlər və MİQ üçün Tövsiyələr

Müəllimlərin İşə Qəbulu – MİQ üzrə imtahanlara artıq bir aydan az vaxt qalıb. İmtahanlara hazırlaşıb və müəllim olmaq istəyən hər kəsə uğurlar arzulayırıq.

MİQ imtahanı yaxınlaşdıqca həyəcan və stress də özünü göstərməyə başlayır. Çox yaxşı bildiyiniz mövzuları sanki unutmusunuz kimi hiss edə, dəfələrlə oxumağınıza baxmayaraq hələ də imtahana hazır olmadığınızı düşünə bilərsiniz. Bu kimi hallar imtahan yaxınlaşdıqca artır. Siz onlara qalib gəlməlisiniz. İlk öncə narahatlıq hissindən qurtulun. Onsuz da o heç bir işə yaramır 😀
İmtahan necə olacaq? Görəsən neçə bal toplayacam? kimi suallarla vaxt itirməyin. Qısa vaxtı effektiv keçirmək üsulu oxumaqdır. Bildiklərinizi təkrarlayın, bilmədiklərinizi öyrənin və çoxlu test işləyin. Vaxt azdır, necə çatdırıb öyrənə bilərəm fikrindəsinizsə, bu məqaləmizə mütləq baş çəkin.
İmtahana hazırlaşanların tez-tez etdiyi səhv son günlər istirahət etmədən oxumaq, beyni yükləməkdir. Həmin günləri təkrara ayırmaq, son gün isə istirahət etmək ən yaxşısıdır. MİQ və ya digər bir imtahana 1 gün qalmış kitabları bağlayın və imtahan üçün enerji toplayın.

DIM Blok imtahan sinaq - oxuyan online sinaq
DIM Blok imtahan sinaq – oxuyan online sinaq

MİQ imtahanı son yox, hələ başlanğıcdır. Əsas imtahanlar, yeniliklər, karyera addımları ondan sonra başlayır. Müəllim olmaq sadəcə MİQ imtahanından uğurla keçmək deyil. Bu şərəfli sənətin özünəxas gözəllikləri var, həmçinin çətinlikləri. Siz onlara da hazır olmalısınız. Sizin üçün dünyanın fərqli ölkələrindən müəllimlərin tövsiyələrindən danışacağıq. Onları oxuyarkən sanki özünüzə sirdaş tapmış kimi hiss edə bilərsiniz.

Səhvlər öyrənmək üçündür. Müəllim hər suala doğru cavab verməlidir və ya müəllim səhv edə bilməz fikirlərindən daşının. Bu düşüncədə olan insanlara da fikrin doğru olmadığını izahın edin. Səhvlər ən yaxşı öyrənmək üsuludur. Onlara qucaq açın və niyəsini öyrənməyə çalışın. Bəzən müəllimlər belə situasiyada özlərini itirir və ya tragediya olmuş kimi üzülürlər. İnkişaf etmək üçün özünüzə səhv etmək şansını verin.

Başlanğıclar çətin olur. Dərs deməyə yeni başladığınız vaxtlar çətinliklər olacaq, bu normaldır. Hər yeni başlayan müəllim sizinlə eyni hissləri yaşayır. Müəllimlərlə yoldaşlıq etsəniz, çətinliklərin üstəsindən gəlmək daha asan olacaq. Kollektivə ilk qatıldığınız gündən əlaqələr qurun, fikir mübadilələri aparın.

Niyə öyrətdiyinizi tez-tez yada salın. Yaxşı müəllim olmaq üçün şagirdlərinizə nəyi niyə öyrətdiyinizi bilməlisiniz. Bu gün verdiyiniz bilikləri onlar harada istifadə edəcəklər?, Onlar üçün nə kimi faydası olacaq? Daim bu suallar və onların cavabları haqqında düşünün. Bunları bilmək sizi yaxşı müəllim etməklə yanaşı motivasiyada qalmağınıza da kömək edəcək.

Bacarmayacam hissi bəzən qonaq gəlir. Müəllimlərin böyük əksəriyyətinin yaşadığı, çoxunun is etiraf etmədiyi duyğu bacarmamaq hissidir. Belə düşünməyin səbəbləri yorğunluq, çətinliklər, yeni tədris üsulları və s. ola bilər. Onu yadda saxlayın ki, səbəbi hər nə olur olsun sonda siz bacaracaqsınız! Hətta o düşüncədən azad olduqdan sonra özünüzü əvvəlkindən daha güclü hiss edəcəksiniz.

Təqdir üçün səbirli olmaq lazımdır. Möhtəşəm işlər reallaşdırıb heç kəsdən təqdir görməyə bilərsiniz. Sizin üçün böyük nailiyyət başqaları üçün kiçik görünə bilər. Unutmayın, əməyinizin qarşılığını şagirdləriniz uğur qazandıqda təqdiri isə illər sonra sizi xatırlayıb baş çəkən və təşəkkür edən tələbələrlə görüşdükdə alacaqsınız. Ən böyük qürur hissi isə bir zamanlar parta arxasında əyləşən şagirdlərinizi illər sonra sahəsi üzrə öncül mütəxəssislər olaraq görməkdir. Bəlkə uzun illər çəkəcək, amma sondakı o təşəkkür çəkdiyiniz bütün əziyyəti unutduracaq.

Çətin valideynlərlə görüşə hazır olun. Müəllim olmazdan öncə yalnız şagirdlərə dərs keçəcəyinizi düşünürsünüz, amma məktəbdə sizi həmçinin çətin valideynlər qarşılayır. Onlarla dil tapmaq və bütün məsələləri asan formada həll etmək üçün psixoloji biliklərinizi artırmağınız məsləhətdir. Yaxşı pedaqoq olmaq üçün psixoloji bacarıqlara hər zaman ehtiyacınız olacaq. Vaxt itirmədən öyrənməyə başlayın.

Şagirdlərinizdən öyrənməyə hazır olun. Onlar dəyişən çağa çox tez ayaq uydurur və yenilikləri asan mənimsəyirlər. Düşüncələrini paylaşmaq üçün tez-tez sizə müraciət edəcəklər. Bəzən sizə fərqli təkliflər, yeni bilikləri bölüşmək üçün yaxınlaşacaqlar. Bütün bunlara hazır olun. Ən əsası onların fikirlərinin reallaşdırmasına, faydalı olmalarına icazə verin. Gələcəkdə onlara güvəndiyiniz üçün sizə təşəkkür edəcəklər.

Sadalanan situasiyalar karyeranız zamanı hər an qarşınıza çıxa bilər. Önəmli olan onlara hazır olmaq və ən düzgün qərarı verməkdir. Müəllimlik şərəfli olduğu qədər həm də çətindir. Bütün digər peşələrin təməlini qoyan sənət asan ola da bilməzdi.

Göründüyü kimi müəllim olmaq sadəcə sinif otağına vaxtında daxil olub dərs deməkdən ibarət deyil. İnsan yetişdirmək, onun gələcəyini qurmaq böyük məsuliyyət tələb edir. Bu məsuliyyətli işdə sizə dillər əzbəri olacaq uğurlara imza atmağı arzu edirik!

DIM Blok imtahan sinaq - oxuyan online sinaq
DIM Blok imtahan sinaq – oxuyan online sinaq

 1,172 total views

Default image
Nigar Şabanova
Articles: 8