Bakalavriat təhsilini başa vurmuş hər məzun magistr dərəcəsinə yiyələnmək üçün imtahan verə bilər. Magistr təhsili həm ödənişli, həm də dövlət sifarişli əsaslarla həyata keçirilir. Hər bir Azərbaycan vətəndaşı bir dəfə dövlət sifarişli magistr təhsili ala bilər. Hansı universitetdə təhsil alması məzunun şəxsi seçimidir. Magistr pilləsini əksər Azərbaycan universitetində oxuya bilərsiniz. Qeyd etmək lazımdır ki, Azərbaycanda həm dövlət, həm də özəl universitetlər fəaliyyət göstərir və əksəriyyətində magistratura ixtisasları mövcuddur. Biz – oxuyan.az komandası olaraq bu bloqumuzda Bakı Dövlət universitetinin magistratura ixtisasları haqqında məlumat verəcəyik.
Magistratura imtahanları və qəbul
Hər il ali təhsilini artırmaq istəyən bakalavriatlar üçün magistraturaya qəbul imtahanı keçirilir. Magistratura təhsili məcburi deyil, təhsilini və elmi dərəcəsini artırmaq istəyən, 2 il daha da inkişafla dolu tələbəlik illəri yaşamaq istəyən hər bir məzun bu imtahanlarda özünü sınaya bilər. Magistratura imtahanlarında bakalavrların məntiqi təfəkkürü, xarici dil biliyi və informatikadan bilik səviyyələri yoxlanılır. Bu məqsədlə bakalavrlara 50 məntiq, 25 xarici il üzrə, 25 informatika üzrə test tapşırıqları təqdim olunur. Hər test tapşırığı 1 balla hesablanır. Hər bir fəndən 5 açıq tipli test verilir. Həmçinin xarici dil tapşırıqlarında dinləmə testlərini də cavablandırmaq tələb olunur. Sualların cavablandırılması üçün təqdim olunan vaxt 3 saatdır.
Şərtləri ödəyən bakalavrlar ixtisas seçimi edə bilərlər. Magistratura və ixtisas seçimi ilə bağlı ətraflı məlumatı “Magistr” jurnalından və ya Təhsil Nazirliyinin rəsmi səhifəsindən əldə edə bilərsiniz: http://dim.gov.az/activities/exams/magistratura/
“Görəsən, magistraturanı oxuyum, ya oxumayım?”
Universitetin dördüncü kursunda oxuyan və ya məzun olan əksər bakalavr özünə bu sualı verir və əksər vaxtlarda cavab tapa bilmir.
Əgər bakalavr təshiliniz sizi qane edirsə, işləyəcəyiniz müəssisə sizdən magistr təhsili tələb etmirsə, yiyələndiyiniz sahəni universitetlərdə tədris etmək arzunuz yoxdursa, bakalavrı bitirən kimi birbaşa praktikaya və iş həyatına atılmaq istəyirsinizsə, nəzəriyyəyə kifayətdir deyirsinizsə magistratura təshilini ehtiyac olanadək oxumaya bilərsiniz. Yox, əgər yuxarıda sadaladıqlarımızın əksidirsə, magistr təhsilinə ciddi ehtiyac duyursunuzsa, magistratura imtahanına qeydiyyatdan keçmək, universitetlər və ixtisaslar üzrə araşdırma etməyə başlamalısınız. Ən vacibi isə imtahan hazırığıdır. Siz imtahanlara hazırlaşın, biz universitetlər və ixtisaslar haqqında məlumatları paylaşacağıq, siz araşdırmağa vaxt itirmədən oxuya bilərsiniz. Gəlin elə Azərbaycanın ilk universiteti olaraq 100 ildən artıq fəaliyyət göstərən Bakı Dövlət Universitetinin magistratura ixtisaslarından başlayaq…
BDU magistratura ixtisasları
Gəlin fakültələr və ixtisaslara ümumi nəzər salaq. Qeyd etmək lazımdır ki, bakalavr səviyyəsində yiyələndiyiniz ixtisas haqqında ümumi və hərtərəfli məlumatlar verilir, magistr səviyyəsi isə bir qədər fərqlidir. Bakalavrı bir ağac kimi düşünsək, magistrı budaqları kimi təsəvvür edə bilərik. 4 il ərzində ümumi təsəvvürləri və nəzəriyyəni öyrəndikdən sonra, gələcək sahən olan bir qolu seçirsən və iki il müddətində o sahədə ixtisaslaşırsan. Bu baxımından magistr səviyyəsində sahələr və seçimlər daha konkret və çoxdur.
Jurnalistika fakültəsi
Jurnalistika fakültəsi deyəndə insanın ağlına ilk BDU gəlir. Ən məhşur jurnalistlər vaxtilə BDU tələbəsi olmuşlar. BDU jurnalistika ixtisasları üçün ideal seçimdir, çünki kifayət qədər təcrübə qazanılmış bir fakültədir və işinin peşakarı olan müəllimlər tədris edir.
Əgər bakalavr ixtisasısınız jurnalistikadırsa, magistraturada radio-televiziya jurnalistikası, publisist-jurnalist, beynəlxalq jurnalistika, mətbuat tarixi. Maraq dairənizi və işləmək istədiyiniz müəssisələri nəzərə alaraq seçim edə bilərsiniz. Məsələn siz radio-televiziya kimi müəssiələri sevirsinizsə, kariyeranızı o müəssisələrdə planlaşdırırsınızsa radio-televiziya jurnalistikası ixtisasını seçə bilərsiniz.
Hüquq fakültəsi
Əgər siz bakalavrda hüquqşünaslıq üzrə təhsil almısınızsa, magistrda hüququn bir çox istiqamətlərində magistratura təhsili ala bilərsiniz. Əgər hüququn nəzəriyyəsi və tarixi sizin maraq dairənizdədirsə, xüsusilə dövlət qulluğuna yönələcəksinizsə, Dövlət hüququ nəzəriyyəsi və tarixi, dövlət hüququ, konstitusiya hüququ ixtisaslarını seçə bilərsiniz. Əgər sahibkarlıq və ticarətlə bağlı sahələrlə bağlı sahələrdə çalışmağı planlaşdırırsınızsa, mülki və təsərrüfat hüququ, , kommersiya hüququ ixtisaslarını düşünə bilərsiniz. Beynəlxalq arenada hüquqi məsələri öyrənmək və iş imkanlarınızı beynəlxalq səviyyədə artırmaq niyyətindəsinizsə, beynəlxalq hüquq, insan hüquqları, Avropa hüququ ixtisasları sizin üçün maraqlı olacaqdır.
Cinayət hüququ, cinayət prosesi, kriminalisika və məhkəmə ekspertizası isə məhkəmə və cinayət işləri üzrə işləmək istəyən hüquqşünasların seçimi ola bilər.
Sosial elmlər və psixologiya fakültəsi
BDU əksər universitetlərdən fərqli olaraq bir çox sosial elmlər və psixologiya ixtisasın tədrisini həyata keçirir. Bakalavriat səviyyəsində psixologiya oxumusunuzsa və magistr pilləsində hansı istiqamətdə davam edəcəyinizi seçmək üçün bir çox seçim şansınız var. Məsələn, uşaqlarının davranışlarını anlamaq və onlarla işləmək niyyətindəsinizsə, uşaq və yaş psixologiyası sahələrini seçə bilərsiniz. Seçim üçün klinik psixologiya, ümumi psixologiya, hüquq psixologiyası, inkişaf psixologiyası ixtisaslarının da olduğunu unutmayın.
Bakalavriatda fəlsəfə fakültəsini bitirmiş məzunlar magistrda fəlsəfə tarixi, sosial fəlsəfə; sosiologiya bitirmiş məzunlarınsa siyasətin sosiologiyası, İdarəetmənin sosiologiyası, həyat fəaliyyətinin müxtəlif dairələrində sosial iş ixtisaslarını seçə bilərlər.
Filologiya fakültəsi
BDU-nun ən prestijli fakültələrindən biri filologiya fakültəsidir. Azərbaycanın ən məşhur, ən savadlı filoloqları bu ixtisasların məzunu olmuşlar.
Bakalavr ixtisası filologiya olan məzunlar magistrda iki məsələsini nəzərə almalıdır: ədəbiyyat yoxsa, dil üzrə davam etmək istəyi; müəllim kimi fəaliyyət göstərib-göstərməyəcəyi.
Dil üzrə davam etməyi düşünürsünüzsə, dilçiliyin müxtəlif sahələrini seçə bilərsiniz. Məs.: Azərbaycan dili, ümumi diliçilik, Azərbaycan dili və ədəbiyyatın tədrisi metodikası, xarici dil, Türkologiya ixtisaslarını seçə bilərsiniz.
Ədəbiyyat üzrə davam etmək istəyənlər isə: ədəbiyyat nəzəriyyəsi, folklorşünaslıq və mifologiya, ədəbi tənqidin nəzəriyyısi və tarixi, Azərbaycan ədəbiyyatı, xarici ölkə xalq ədəbiyyatları ixtisaslarını seçə bilərlər.
Kimya, fizika, biologiya, coğrafiya, tarix, mexanika-riyaziyyat fakültələri
Qeyd olunan fakültələrin bir çox ixtisasları BDU-da tədris olunur. Bakalavrda bu fakültələrdən məzun olmusununuzsa, magistrda seçim edəndə pedaqoji və ya elmi fəaliyyətlə məşğul olacağınızı mütləq nəzərə almalısınız. Əgər pedaqoji fəaliyyətlə məşğul olacaqsınızsa, metodika ilə bağlı ixtisasları seçim etməyiniz, elmi fəaliyyətlə məşğul olacaqsınızsa, seçdiyiniz sahə üzrə ixtisaslaşmaq istədiyiniz nəzəri ixtisası seçə bilərsiniz.
Qeyd edək ki, bu bloqda bütün fakültə və ixtisaslar haqqında məlumat verilməmişdir. Sadəcə bəzi ixtisaslardan danışmağa çalışdıq. BDU magistr ixtisasları və Bakı Dövlət Universitetində təhsillə bağlı ətraflı məlumat üçün BDU-nun rəsmi səhifəsinə göz gəzdirə bilərsiniz: http://bdu.az/az/content/xtisaslar
11,098 total views
