Tələbə olmaq həyatın sizə təqdim edəcəyi yepyeni imtahanlara bir addım daha yaxın olmaq deməkdir. Ancaq bu imtahanlara nə dərəcə hazır olmaq məhz sizin seçəcəyiniz ixtisasdan asılıdır. Gələcəyin mühəndisi kimi Azərbaycan sənayesində əhəmiyyətli yer tuta bilərsiniz, savadlı bir iqtisadçı olaraq dünya iqtisadiyyatının tanınmış siması ola bilərsiniz, bəlkə də, 3-cü qrup ixtisaslarından olan bir tarixçi, araşdırmaçı-jurnalist olacaq və ya müəllim olaraq yeni fidanlar yetişdirəcəksiniz. Xərçəngin kökünü qazıyacaq olan həkim, bəlkə də, siz olacaqsınız.
Ancaq doğru zamanda doğru seçim etməyiniz arzularınıza gedən cığırda sizə yol xəritəsi olacaqdır. Bunun üçün müxtəlif ixtisas qrupları haqqında məlumatınız olması vacibdir. Məhz bu sizə məqsədinizi müəyyənləşdirməyə və bu məqsəd uğrunda əzmlə çalışmağa kömək edə bilər. “Oxuyan” platforması sizin bu yolda ən yaxın köməkçiniz olacaqdır. Bu bloqumuzda sizə 3-cü qrup ixtisaslar və potensia universitetlər haqqında məlumat verəcəyik.
3-ci qrup ixtisaslarında kimlər təhsil alır?
Humanitar fənləri sevirsinizsə, dünya və lokal tarixə marağınız varsa, araşdırma etməyi sevirsinizsə, 3-cü qrup ixtisasları arasında məhz sizin gələcəyinizin peşəsi “gizlənmiş” ola bilər. Bu qrup üzrə hazırlaşaraq gələcəyin müəllimi, tarixçisi, filosofu, jurnalisti, filoloqu, hüquqşünası, politoloqu və s. ola bilərsiniz.
Bu bloq sizə həyatınızı dəyişəcək ixtisasın hansı olduğunu araşdırmaqda yaxından kömək edəcək.
İxtisas seçimi edərkən nələrə diqqət edilməlidir?
III ixtisas qrupunu seçmiş abituriyentlər kifayət qədər ixtisas seçimi olduğunu bilməlidir. Amma seçim çoxluğu daha çox araşdırma edib, daha düzgün qərar vermə məsuliyyəti də doğurur. Bacarıqlarınıza, hobbi və maraqlarınıza xüsusi diqqət yetirin. Onlar bu işdə sizin yolunuza işıq tutacaq. Aşağıdakı sualları özünüzə verin:
- Hansı peşə sahiblari mənə maraqlı gəlir?
- Hansı işi görmək mənim üçün yorucu deyil?
- Seçəcəyim ixtisas mənə karyera inkişafı vəd edirmi?
- Seçəcəyim ixtisas üzrə xaricdə təhsil imkanları necədir?
- Bu ixtisas 3-cü qrup ixtisasları arasında mənim üçün ən uyğun olanıdırmı?
- 3-cü qrup ixtisasları üzrə qəbul olan tələbələrin həm universitet, həm də seçdikləri ixtisas barədə rəyləri necədir?
3-cü qrup ixtisasların arasında özünüzün yerini axtarın.
Bir dahi deyir ki, məqsədsiz insan yelkənli qayıq kimidir, hərəkəti küləyin əsdiyi istiqamətə bağlıdır. Həyatda qazanacağınız uğurun təməlində maraq dairəniz və ondan doğan məqsəd dayanmalıdır. Məqsədinizi müəyyənləşdirməyiniz ixtisasınızı seçmək yolunda edəcəyiniz araşdırmada sizə motivasiya verəcəkdir.
Müxtəlif dillərə marağınız varsa, bəlkə də, tərcüməçi olmalısınız. Tarixi romanları sevirsinizsə, tarixçi olmaq sizin üçün yeni qapılar aça bilər. Bəlkə də, jurnalist olaraq önəmli hadisələri işıqlandırmaq istəyirsiniz. Ya da Azərbaycan dilçilik elminin inkişafına öz töhfələrini verəcək filoloq olacaqsınız. “Oxuyan” platforması maraq dairənizi kəşf etməkdə sizin ən yaxın yardımçınız olacaqdır.
3-cü qrup ixtisas seçimləri arasında seçim etmək üçün kiçik məsləhətlər
3-cü qrup ixtisasları öz çeşidliliyinə və texniki terminlərin azlığına görə digər qruplardan fərqlənir. Humanitar fənlərin üstünlük təşkil etdiyi bu qrup müxtəlif həyati əhəmiyyətli ixtisasları özündə birləşdirir.
Araşdırma etməyə vaxt ayırın. İmtahana əzmlə çalışmaq qədər düzgün ixtisası təyin etmək üçün həvəskar araşdırmalar aparmaq da vacibdir. Həmin ixtisasda oxuyan və ya məzun olmuş tələbələrdən həmin ixtisasın təmin edəcəyi potensial üstünlükləri, keyfiyyətli təhsili təmin edəcək universiteti və çətinlik dərəcəsini müəyyənləşdirin. Əgər həmin ixtisasa həvəsiniz varsa, bütün çətinliklər sizə asan görünəcək.
Digər tərəfdən bu sahənin maraqlı və əyləncəli tərəflərini kəşf etməyə çalışın. Seçəcəyiniz ixtisasın karyeranızda yüksəliş vəd edib-etmədiyini öyrənin. İşləyəcəyiniz regionda həmin ixtisasa tələbat varmı? Həmçinin ixtisasınız üzrə xarici ölkələrdə iş imkanlarını dəyərləndirin.
3-cü qrupda təhsil ala biləcəyiniz ixtisas və universitetlər
İxtisas seçimi, təbii ki, universitet seçimindən öndə dayanır. Prioritet ixtisası düzgün seçmək olsa da, universitet seçimində edilən yanlışlıq alacağınız təhsilin keyfiyyətinə birbaşa təhsil edə bilər.
Bu başlığın altında 3-cü qrup ixtisasları arasında ən yayğın olanları və əgər bu ixtisası seçmək istəyirsinizsə, hansı universitetdə yaxşı təhsil ala biləcəyinizi qeyd edəcəyik.
Filologiya
Filologiya hər hansı bir xalqın dilini və ədəbiyyatını öyrənərək mədəniyyəti haqqında məlumat toplamağa xidmət edən elmdir. Azərbaycanda bu ixtisas müxtəlif universitetlərdə tədris olunaraq geniş tələbə kütləsinə malikdir.
Bu ixtisas üzrə təhsil alan tələbələr ərəb, türk, ingilis və s. xalqların dil və ədəbiyyatını yaxından öyrənərək Azərbaycanda formalaşan multiculturalist düşüncəyə öz töhfələrini verə bilərlər. Əgər mədəniyyətlərin müxtəlifliyi sizi də maraqlandırırsa, bəlkə də, bu ixtisas elə məhz sizin üçündür.
Bakı Dövlət Universiteti (BDU)
Azərbaycan universitetləri arasında ən qədim universitetlərdən biri sayılan Bakı Dövlət Universiteti savadlı filoloqların yetişdirilməsində öndə gedən təhsil ocaqlarından biridir. Dünyaya Lev Landau kimi önəmli şəxsiyyət bəxş etmiş BDU-da filologiya ixtisası savadlı müəllimlər və professorlar tərəfindən tədris edilir.
Müxtəlif xalqların yaradıcılığı sizə maraqlandırırsa, filologiya ixtisası üzrə BDU-da təhsil ala bilərsiniz. Bununla yanaşı siz burada hüquqşünaslıq və politologiya ixtisasları üzrə də keyfiyyətli təhsil ala bilərsiniz.
Müəllimlik
Əgər ən şərəfli peşəni seçmək və savadlı həkimlər, bacarıqlı mühəndislər, Nobel mükafatçıları yetişdirmək istəyirsinizsə, 3-cü qrupda müəllimlik ixtisası üzrə təhsil ala bilərsiniz. Siz bu ixtisas üzrə hazırlaşaraq Azərbaycan dili və ədəbiyyatı, xarici dil, ibtidai sinif və məktəbəqədər tədris üzrə müəllim kimi işləyə bilərsiniz.
Öyrətməyə həvəsiniz varsa, demək ki, siz özünü pedaqoji sahədə sınamalısınız.
Azərbaycan Dövlət Pedaqoji Universiteti (ADPU)
Pedaqoji kadrların yetişdirilməsində uzun illər liderliyini qorumağı bacaran Azərbaycan Dövlət Pedaqoji Universiteti ən savadlı müəllimləri Azərbaycan təhsilinə bəxş etməkdə davam edir. Müəllimlərin işə qəbulu imtahanlarında ən yüksək nəticə göstərən müəllimlər məhz ADPU-nun məzunlarıdır. Yüksək keyfiyyətli təhsil ilə müəllim adını qazanmaq istəyən tələbələr bacarıqlı professor və müəllim heyətinin rəhbərliyi altında öz məqsədlərinə doğru irəliləyirlər.
Hüquqşünaslıq
III qrup ixtisasları arasında həmişə populyar olan bir ixtisas var ki, o da hüquqşünaslıq ixtisasıdır. Hüquqşünaslıq şərəfli peşələrdən biridir. Şübhəsiz ki, demokratik bir dövlətdə güclü hüquqi strukturların olması hava və su kimi vacibdir. Bunun üçün də öz işinin öhdəsindən bacarıqla gələn hüquqşünasların yetişdirilməsi vacibdir.
Hüquqşünaslıq artıq neçə ildir ki, 3-cü qrup ixtisasları arasında ən prestijli və yüksək nəticə göstərən tələbələrin ən çox müraciət etdiyi peşədir. Nə qədər məsuliyyətli və şərəfli peşə olduğunu nəzərə alsaq, ən bacarıqlı abituriyentlərin hüquqşünaslıq ixtisasına yönəlməsi sevindirici haldır. Qarşılaşdığınız ədalətsizliklərə qarşı bütün qüvvənizlə mübarizə aparmaq istəyirsinizsə, hüquqşünaslıq ixtisası sizin gələcək “pozisiya”-nızdır.
Azərbaycan Diplomatik Akademiyası (ADA)
Azərbaycan universitetləri arasında nüfuzlu yerlərdən birinə sahib olan ADA universiteti dövlətimiz üçün savadlı kadrlar yetişdirmək yolunda inamla irəliləyir. Maliyyə dəstəyiniz varsa, hüquqşünaslıq ixtisası üzrə ən uyğun universitet məhz ADA universitetidir. Bununla yanaşı siz burada 3-cü qrup üzrə “Dövlət və ictimai münasibətlər” ixtisası üzrə də təhsil ala bilərsiniz.
Əgər siz də düzgün ixtisas seçimi etmək və ən vacibi, imtahanlarda müvəffəqiyyət qazanmaq istəyirsinizsə, Oxuyan.az bu yolda sizin ən sevimli köməkçiniz olacaqdır. 3-cü qrup testləri ilə onlayn sınaqlarda iştirak edərək imtahanlara hazırlaşa bilərsiniz.
16,665 total views
